Jakobus 4
Afrikaans PWL
1Waar kom bakleiery en stryery onder julle vandaan? Is dit nie vanuit julle begeertes, wat in julle lede baklei nie? 2Julle begeer ernstig en julle het nie. Julle pleeg moord en is jaloers en julle kan niks kry nie. Julle stry en baklei en julle het nie omdat julle nie vra nie. 3Julle vra en julle ontvang nie omdat julle met bose redes vra, om julle begeertes te voed. 4Egbrekers, weet julle nie dat vriendskap met die wêreld vyandskap teen God is nie? Wie daarom kies om ’n vriend van hierdie wêreld te wees, is ’n vyand van God, 5of dink julle miskien dat die Skrif sonder rede sê: ‘Die gees wat in ons woon, begeer met jaloesie’? 6Ons Meester gee ons groter onverdiende guns, want Hy sê dít: “God verneder die trotses, maar aan die nederiges gee Hy onverdiende guns.”

7Wees dan gehoorsaam aan God en staan op teen die teëstander 1 Kefa 5:9 en hy sal van julle af wegvlug. 8Kom nader na God toe en Hy sal nader kom na julle toe. Sondaars, reinig julle hande; twyfelaars, sonder julle gedagtes, wil en emosies af! 9Wees nederig, treur en huil. Laat julle gelag in rou verander word en julle blydskap in droefheid. 10Wees nederig voor יהוה en Hy sal julle oplig.

11Broers, moenie teen mekaar praat nie. Hy wat teen sy broer praat en sy broer oordeel, praat teen die wet en oordeel die wet en as jy die wet oordeel, is jy nie ’n doener van die wet nie, maar sy regter. 12Hy wat die geskrewe wet gee en oordeel, is Een. Wie is in staat om aan jou lewe te gee en jou te vernietig? Jy, wie is jy wat jou naaste oordeel?

13Wat sal ons sê van hulle wat sê: “Vandag of môre sal ons na ’n stad toe gaan en daar een jaar lank werk en handel drywe en wins maak” 14en hulle weet nie eens wat môre bring nie, want soos wat is ons lewe? Dit is ’n mis wat vir ’n kort tydjie verskyn en dan verdwyn en weggaan. 15In plaas dat hulle sê: “As יהוה wil en ons lewe, sal ons dit of dat doen,” 16maar nou roem hulle in hul trots. Al sulke roem is boosheid. 17Wie ook al weet wat goed is en dit nie doen nie, vir hom is dit sonde.

Die Pad van Waarheid tot die Lewe Afrikaanse (Die Pad van Waarheid tot die Lewe Afrikaans Translation of the Bible). Courtesy of www.padwlewe.ch. Used by Permission.

Bible Hub
James 3
Top of Page
Top of Page