Eksodus 26
Afrikaans PWL
1Jy moet verder die tabernakel van tien gordyne maak, van wit geweefde linne met blou, pers en bloedrooi garing ingevleg; met gérubs kunstig ingevleg, moet jy dit maak. 2Die lengte van elke gordyn moet agt en twintig el wees en die breedte van elke gordyn vier el. Al die gordyne moet dieselfde mate hê. 3Vyf van die gordyne moet aanmekaar vasgewerk word en die ander vyf gordyne aanmekaar. 4Jy moet lissies van blou materiaal maak aan die kant van die buitenste gordyn van die een stel en jy moet dit net so maak aan die buitekant van die gordyn van die tweede stel. 5Jy moet vyftig lissies aan die een gordyn maak en jy moet vyftig lissies maak aan die rand van die gordyn wat aan die tweede stel behoort. Die lissies moet regoor mekaar pas. 6Jy moet ook vyftig goue hakies maak en die gordyne aanmekaar vassit met die hakies sodat die tabernakel een is.

7Jy moet ook gordyne van bokhaar maak as ’n tentbedekking oor die tabernakel: jy moet elf gordyne maak. 8Die lengte van elke gordyn moet dertig el wees en die breedte van elke gordyn vier el: die elf gordyne moet dieselfde mate hê. 9Jy moet vyf van die gordyne afsonderlik aanmekaar werk en ses van die gordyne afsonderlik en jy moet die sesde gordyn dubbel vou aan die voorkant van die tent. 10Jy moet vyftig lissies maak aan die kant van die laaste gordyn van die een stel en vyftig lissies aan die kant van die laaste gordyn van die tweede stel.

11Jy moet ook vyftig koper hakies maak en die hakies in die lissies steek en jy moet die tentbedekking aanmekaar las sodat dit een is. 12Die stuk van die gordyn van die tentbedekking wat oorbly, die halwe gordyn wat oorbly, moet oorhang aan die agterkant van die tabernakel 13en ’n el aan weerskante van die lengte van die gordyne moet oorhang aan die sykante van die tabernakel, aan weerskante, om dit toe te dek. 14Jy moet ook vir die tent ’n bedekking van rooigekleurde ramsvelle maak en ’n bedekking van dugongvelle daar bo-oor.

15Jy moet ook die regopstaande planke vir die tabernakel van akasiahout maak. 16Die lengte van ’n plank moet tien el wees en die breedte van elke plank een en ’n half el. 17Elke plank moet twee tappe hê wat hulle aan mekaar kan bind. Jy moet dit so maak vir al die planke van die tabernakel. 18Jy moet die planke vir die tabernakel maak: twintig planke vir die suidekant. 19Jy moet ook veertig silwer voetstukke vir die twintig planke maak: twee voetstukke onder elke plank vir sy twee tappe. 20Vir die tweede sykant van die tabernakel, aan die noordekant, twintig planke 21met hulle veertig silwer voetstukke: twee voetstukke onder elke plank. 22Vir die kant van die tabernakel, na die weste toe, moet jy ses planke maak. 23Jy moet ook twee planke maak vir die hoeke van die tabernakel, aan die agterkant. 24Hulle moet van onder tot bo dubbel wees en bo en onder vas met een ring. So moet dit met altwee wees; hulle sal vir die twee hoeke wees. 25Daar sal dus agt planke wees met hulle silwer voetstukke, sestien voetstukke: twee voetstukke onder elke plank.

26Jy moet ook pale van akasiahout maak: vyf vir die planke aan die een sykant van die tabernakel 27en vyf pale vir die planke aan die ander sykant van die tabernakel; ook vyf pale vir die planke aan die kant van die tabernakel na die weste. 28Die middelste balk moet deur die middel van die planke loop, van ent tot ent. 29Jy moet die planke met goud oortrek en hulle ringe, as plekke vir die pale, moet jy van goud maak. Die pale moet jy ook met goud oortrek. 30Jy moet die tabernakel oprig volgens die plan wat vir jou op die berg gewys is.

31Jy moet ’n verdelingsgordyn maak van blou, pers en bloedrooi materiaal en wit geweefde linne, met gérubs kunstig ingewerk. 32Jy moet dit aan vier pilare van akasiahout, wat met goud oorgetrek is, ophang. Hulle hake moet van goud wees en op vier silwer voetstukke staan. 33Jy moet die verdelingsgordyn aan die hakies ophang en die ark van die Getuienis daar inbring, binnekant die verdelingsgordyn. Die verdelingsgordyn moet vir julle ’n skeiding maak tussen die Afgesonderde en die Mees Afgesonderde. 34Jy moet die Toedekking op die Ark van die Getuienis neersit in die Mees Afgesonderde Plek. 35Sit die tafel buitekant die verdelingsgordyn en die lampstaander teenoor die tafel aan die suidekant van die tabernakel. Die tafel moet jy aan die noordekant sit.

36Jy moet ook vir die ingang van die tent ’n bedekking maak van blou, pers en bloedrooi materiaal en wit geweefde linne, die produk van kunstige weefwerk. 37Jy moet vir die bedekking vyf pilare van akasiahout maak en dit oortrek met goud; hulle hake moet ook van goud wees en jy moet vyf koper voetstukke vir hulle giet.

Die Pad van Waarheid tot die Lewe Afrikaanse (Die Pad van Waarheid tot die Lewe Afrikaans Translation of the Bible). Courtesy of www.padwlewe.ch. Used by Permission.

Bible Hub
Exodus 25
Top of Page
Top of Page