Afrikaans PWL 1Terwyl Apollos in Korinthos was, het Sha’ul deur die boonste gebiede gereis en in Efesos gekom waar hy ’n paar studentevolgelinge gevra het:
2“Het julle die Gees van Afsondering ontvang toe julle tot vertroue gekom het?” Hulle antwoord hom: “Ons het nog nie eens gehoor dat daar ’n Gees van Afsondering is nie.”
3Hy vra vir hulle: “In watter doop is julle dan gedoop?” Hulle antwoord: “In die doop van Yoganan.”
4Sha’ul sê vir hulle: “Yoganan het gedoop in die doop van berou oor en wegdraai van die sonde en aan die mense gesê dat hulle moes vertrou in die Een wat ná hom kom, dit is, in Die Gesalfde Een, Yeshua.”
5Toe hulle dit hoor, is hulle gedoop in die Outoriteit en Karakter van ons Meester, Yeshua, Die Gesalfde Een
6en Sha’ul het hulle die hand opgelê en die Gees van Afsondering het op hulle gekom en hulle het in verskeie tale gepraat en geprofeteer.
7Hulle was twaalf manne. 8Sha’ul het in die bymekaarkomplek ingegaan en vrymoediglik vir drie maande met hulle geredeneer en hulle oortuig van die Koninkryk van God, 9maar toe sommige hulle verhard en nie vertrou nie en voor die mense aanhou kwaadpraat van ‘die Pad van God’, het hy van hulle af onttrek en elke dag met die studentevolgelinge afsonderlik besprekings gehou in die skool van ’n sekere Turannos. 10Dit het twee jaar lank aangehou totdat almal wat in Asië gebly het die boodskap van יהוה gehoor het, Arameërs, sowel as Jode. 11God het baie wonderwerke deur die hande van Sha’ul gedoen 12sodat selfs wanneer handdoeke of voorskote wat aan sy lyf was, op die siekes gelê is, die siektes van hulle af weggegaan en demone uit hulle uitgegaan het. 13Sommige van die rondreisende Jode, duiwelbesweerders, het dit gewaag om die Naam van ons Meester, Yeshua, te noem oor die wat bose geeste gehad het en te sê: “Ons dryf jou uit in die Karakter en Outoriteit (Naam) van díe Yeshua wat Sha’ul verkondig!” 14Dit is deur sewe seuns van ’n sekere Skevas, ’n Joodse leierpriester, gedoen, 15maar hierdie bose demoon het geantwoord en gesê: “Yeshua ken ek en Sha’ul ken ek, maar julle, wie is julle?” 16Toe spring die man, in wie die bose gees was, op hulle en oormeester en gooi hulle neer sodat hulle kaal en gewond uit daardie huis weggevlug het. 17Dit het bekend geword aan al die Jode en Arameërs wat in Efesos bly, vrees het op hulle almal gekom en die Outoriteit en Karakter van die Meester, Yeshua, is grootgemaak. 18Baie van die wat vertrou het, het gekom en erken wat hulle gedoen het en dat dit verkeerd was; 19heelwat van die wat met towery omgegaan het, het die boekrolle saamgebring en voor almal verbrand en hulle het die waarde daarvan bereken en gevind dat dit vyftig duisend silwer stukke was. 20So het die vertroue in God kragtig in krag gegroei. 21Toe hierdie dinge verby was, het Sha’ul in sy gedagtes besluit om na Makedonia en Agaia te gaan en dan na Yerushalayim. Hy het gesê: “Nadat ek daar was, is dit nodig dat ek Rome ook sien.” 22Toe stuur hy twee van sy helpers, Timotheos en Erastos, na Makedonia terwyl hy self nog ’n tyd lank in Asië bly. 23Daardie tyd het daar ’n groot opskudding gekom oor ‘die Pad van God’, 24want iemand met die naam van Demetrios, ’n silwersmid, maker van silwer tempeltjies van Artemis, het vir die ambagsmanne ’n aansienlike inkomste voorsien. 25Toe hy hulle, asook werkers in dieselfde bedrywe, bymekaargeroep het, sê hy: “Manne, julle weet dat ons winste alles uit hierdie besigheid is 26en julle sien en hoor dat nie alleen in Efesos nie, maar byna in die hele Asië, hierdie Sha’ul baie mense oortuig en laat wegdraai het deur te sê dat dít wat met hande gemaak word, geen gode is nie. 27Nou is daar nie alleen gevaar dat hierdie ambag van ons verag sal word nie, maar ook dat die tempel van die groot godin, Artemis, as minder gereken sal word en dat haar wonderlikheid, wat die hele Asië, ja, die wêreld, vereer, verag sal word.” 28Toe hulle dit hoor, is hulle met woede vervul en het geskree en gesê: “Groot is Artemis van die Efesiërs!” 29Daarop raak die hele stad in oproer en hulle storm soos een man na die teater en sleep vir Gaios en Aristargos, manne van Makedonia wat saam met Sha’ul gereis het, saam. 30Toe Sha’ul tussen die mense wou ingaan, het die studentevolgelinge hom gekeer. 31Leiers van Asië, wat sy vriende was, het ook ’n boodskap vir hom gestuur en hom versoek dat hy nie in die teater moes ingaan nie. 32Die skare het deurmekaar geskree, sommige dit en ander dat, want hulle was deurmekaar en die meeste het nie geweet waaroor hulle bymekaargekom het nie, 33maar die Jode het Alexandros vanuit die mense vorentoe gestoot en Alexandros het met die hand ’n teken gegee en wou hom by die mense verdedig. 34Toe hulle herken dat hy ’n Jood is, gaan daar een geroep van almal op terwyl hulle omtrent twee ure lank skree: “Groot is Artemis van die Efesiërs!” 35Die stadsklerk het die skare stilgemaak en gesê: “Efesiërs, watter mens is daar tog wat nie weet dat die stad van die Efesiërs die dienaars is van die groot godin Artemis en van die beeld wat uit die hemel geval het nie? 36Terwyl dit dan nie weerspreek kan word nie, behoort julle rustig te word en niks haastigs te doen nie, 37want julle het hierdie manne gebring, wat nie tempelrowers is nie en ook nie kwaad gepraat het teen julle godin nie. 38As Demetrios en sy ambagsmanne dan ’n saak teen iemand het, die hofsittings word gehou en daar is regters: laat hulle mekaar aankla, 39maar as julle nog iets anders verlang, sal dit in die wettige vergadering besluit word, 40want ons loop gevaar om oor die oproer van vandag tot verantwoording geroep te word, aangesien daar geen grond is waarop ons sal kan rekenskap gee van hierdie deurmekaarspul nie.” 41Met hierdie woorde het hy die skare laat gaan. Die Pad van Waarheid tot die Lewe Afrikaanse (Die Pad van Waarheid tot die Lewe Afrikaans Translation of the Bible). Courtesy of www.padwlewe.ch. Used by Permission. Bible Hub |
    |