Handelinge 15
Afrikaans PWL
1Manne wat van Y’hudah af gekom het, het die broers geleer: “As julle nie besny word, volgens die tradisie van die wet nie, kan julle nie lewe hê nie.” 2Hieroor het daar ’n groot opstand en woordewisseling van die kant van Sha’ul en Bar-Nabba teen hulle ontstaan en daar is besluit dat Sha’ul, Bar-Nabba en nog sekere ander van hulle, sou opgaan na die afgevaardigdes en oudstes in Yerushalayim, in verband met hierdie vraagstuk. 3Hulle is hierop deur die gemeente uitgestuur en het deur Foinike en Shomron gegaan en vertel van die ander nasies se wegdraai van sondes na God toe en dit het groot blydskap vir al die broers gebring. 4By hulle aankoms in Yerushalayim is hulle deur die gemeente, die afgevaardigdes en die oudstes ontvang en hulle het verslag gedoen van al die dinge wat God deur hulle gedoen het,

5maar sommige gelowiges uit die party van die Fariseërs het opgestaan en gesê: “Dit is noodsaaklik dat hulle besny word en beveel word om die wet van Moshe te onderhou.”

6Die afgevaardigdes en die oudstes het bymekaargekom om hierdie saak te ondersoek 7en nadat ’n groot debat gevolg het, het Shim’on opgestaan en vir hulle gesê: “Broers, julle weet dat God van die begin af gekies het dat die nasies deur my mond die goeie boodskap sal hoor en vertrou 8en God, wat die verstand, wil en emosie ken, het aangaande hulle getuig deur aan hulle die Gees van Afsondering te gee net soos aan ons. 9Hy het geen onderskeid tussen ons en hulle gemaak nie, aangesien Hy hulle verstand, wil en emosie gereinig het deur vertroue. 10Nou waarom toets julle God deur op die nek van die studentevolgelinge ’n juk te lê wat nie ons vaders of ons in staat was om te dra nie? 11Ons vertrou dat ons, deur die onverdiende guns van ons Meester, Yeshua, Die Gesalfde Een, lewe ontvang deur vertroue, net soos hulle.”

12Almal in die byeenkoms het stilgebly en na Bar-Nabba en Sha’ul geluister terwyl hulle van al die tekens en wonders vertel wat God deur hulle onder die nasies gedoen het.

13Toe hulle stilgebly het, staan Ya’akov op en sê: “Broers, luister na my! 14Shim’on het vertel presies hoe God in die begin besluit het om mense uit die ander nasies vir Sy Karakter en Outoriteit (Naam) aan te neem 15en dit stem ooreen met die boodskap wat die profete geskryf het:

16‘Daarna sal Ek terugkom en die gevalle tent van Dawid weer herbou en wat daarvan vernietig is, sal Ek weer herbou en herstel

17sodat die oorblyfsel van die mense יהוה kan soek, uit al die nasies oor wie My Outoriteit en Karakter uitgeroep is, sê יהוה, wat al hierdie dinge gemaak het.’

18God se werke is van ewigheid af bekend. 19As gevolg hiervan sê ek dat ons hulle, wat vanuit die ander nasies na God toe gedraai word, nie verder moet belas nie, 20maar aan hulle skryf dat hulle hul moet afsonder van dié dinge wat deur afgode besoedel is, van alle seksuele immoraliteit, van wat verwurg is en van bloed, 21want van die vroegste geslagte af het Moshe díégene, wat hom in elke stad verkondig terwyl hy elke Shabbat in die bymekaarkomplekke gelees word.”

22Toe het die afgevaardigdes en die oudstes saam met die hele gemeente manne vanuit hulle gekies en na Antiogeia gestuur saam met Sha’ul en Bar-Nabba; naamlik Y’hudah, wat genoem word Bar-Sabba en Sila, manne wat leiers onder die broers was. 23Deur hulle hand het hulle dít geskryf: “Die afgevaardigdes, die oudstes en die broers; aan die broers uit die nasies in Antiogeia, Sirië en Kilikia: vrede, gesondheid, voorspoed en vergenoegdheid! 24Ons hoor dat sommige wat vanaf ons uitgegaan het, julle met boodskappe, wat ons hulle nie beveel het nie, ontstel en julle gees omgekrap het deur te sê dat julle die godsdienstige gebruike moet onderhou en besny moet word. 25As gevolg hiervan het ons met een gesindheid besluit om manne te kies en na julle te stuur saam met ons vriende, Bar-Nabba en Sha’ul, wat ons liefhet. 26Manne wat hulleself oorgegee het ter wille van die Outoriteit en Karakter van ons Meester, Yeshua, Die Gesalfde Een. 27Ons het vir Y’hudah en Sila uitgestuur om deur woorde dieselfde dinge te sê, 28want die Gees van Afsondering en ons het besluit om geen las op julle te lê, behalwe wat nodig is nie: 29dat julle wegbly van afgodsoffers, van bloed, van wat verwurg is en van alle seksuele immoraliteit. As julle dit streng nakom, sal julle getrou wees in ons Meester.”

30Hulle wat uitgestuur is, het in Antiogeia gekom en hulle het die mense bymekaargeroep en die brief oorhandig. 31Toe hulle dit gelees het, was hulle verheug en was bemoedig. 32Y’hudah en Sila, wat self ook profete was, het die broers met baie boodskappe bemoedig en versterk. 33Nadat hulle ’n tyd daar deurgebring het, het die broers hulle met vrede, gesondheid, voorspoed en vergenoegdheid na die afgevaardigdes laat teruggaan, 34maar Sila het besluit om daar te bly. 35Sha’ul en Bar-Nabba het in Antiogeia gebly en geleer en saam met nog baie ander die boodskap van God verkondig.

36’n Paar dae daarna het Sha’ul vir Bar-Nabba gesê: “Kom ons gaan terug en besoek ons broers in al die stede waarin ons die boodskap van God verkondig het, om te sien hoe dit met hulle gaan. 37Bar-Nabba wou vir Yoganan, wat Markos genoem word, saamvat, 38maar Sha’ul het dit nie reg geag om hóm saam te vat wat hulle van Pamfulia af verlaat het en nie saam met hulle gegaan het nie. 39As gevolg van hierdie verskil het hulle van mekaar geskei en het Bar-Nabba vir Markos saamgevat en na Kupros geseil,

40maar Sha’ul het Sila gekies en vertrek nadat hy deur die broers aan die onverdiende guns van God opgedra is. 41Hy het na Sirië en Kilikia gegaan en die gemeentes versterk.

Die Pad van Waarheid tot die Lewe Afrikaanse (Die Pad van Waarheid tot die Lewe Afrikaans Translation of the Bible). Courtesy of www.padwlewe.ch. Used by Permission.

Bible Hub
Acts 14
Top of Page
Top of Page