Spreuke 26
Afrikaans PWL
1Soos sneeu in die somer en soos reën in die oestyd, so is eer nie toepaslik op ’n dwaas nie.

2Soos die voëls en die swaweltjies rondvlieg in die lug, so sal die vervloeking sonder oorsaak weggedryf word.

3’n Sweep is vir ’n perd, ’n toom vir ’n donkie en ’n lat vir die rug van ’n dwaas.

4Moenie ’n dwaas antwoord volgens sy dwaasheid nie sodat jy nie ook net soos hy word nie,

5maar antwoord ’n dwaas volgens jou wysheid sodat hy nie in homself dink dat hy wys is nie.

6Hy wat ’n boodskap stuur deur die hand van ’n dwaas, kap sy eie voete af met pyn.

7Soos ’n lam man wat nie kan loop nie, so is ’n vergelykende storie in die mond van ’n dwaas.

8Soos ’n klip in ’n slingervel, so is hy wat eer gee aan ’n dwaas.

9Dorings spring op in die hand van ’n dronkaard en dwaasheid in die mond van die dwaas.

10Die liggaam van ’n dwaas word baie geteister en ’n dronkaard dink dat hy ’n see kan oorgaan.

11Soos ’n hond wat na sy uitbraaksel teruggaan, so is ’n dwaas wat in sy dwaasheid verkeerd optree.

12As jy ’n man sou sien wat wys is in sy eie oë, ’n dwaas is beter as hy.

13Wanneer hy gestuur word, sê die luiaard: “Daar is ’n leeu op die pad en let op, daar is moord in die strate!”

14Soos ’n deur op sy skarniere draai, so draai die luiaard op sy bed.

15Die luiaard steek sy hande weg binne sy kleed en sal nie eens weer probeer om hulle na sy mond te bring nie.

16Die luiaard is wyser in sy eie oë as sewe manne met goeie oortuiging.

17Hy wat inmeng in ’n twis wat hom nie aangaan nie, is soos een wat ’n hond aan die ore gryp.

18Soos trotse manne wat skerp en dodelike woorde uiter soos pyle,

19so is die man wat sy naaste bedrieg; wanneer hy gevang word, sê hy: “Ek het net ’n grap gemaak.”

20Wanneer daar geen hout is nie, gaan die vuur dood en waar daar geen twisgierige is nie, hou die stryd op.

21Soos kole is vir gloeiende kole en hout vir vuur, so is ’n twisgierige man om stryd aan te hits.

22Die woorde van ’n twisgierige stook moeilikheid op, hulle gaan af tot in die binneste van die verstand, wil en emosie.

23Soos silwer skuim wat aan ’n kleipot vassit, so is woedende lippe en ’n bose verstand, wil en emosie.

24Hy wat haat, is bekend deur sy eie lippe; in sy binneste koester hy bedrog.

25Alhoewel hy met ’n sagte toon praat, vertrou hom nie, want daar is sewe verwerplikhede in sy verstand, wil en emosie.

26Hy wat haat in sy binneste wegsteek se boosheid sal in die vergadering openbaar word.

27Hy wat ’n put grawe, sal daarin val en hy wat ’n klip rol, dit sal op hom terugkom.

28’n Leuenagtige tong haat die waarheid en ’n moeilikheidmakende mond wek stryd op.

Die Pad van Waarheid tot die Lewe Afrikaanse (Die Pad van Waarheid tot die Lewe Afrikaans Translation of the Bible). Courtesy of www.padwlewe.ch. Used by Permission.

Bible Hub
Proverbs 25
Top of Page
Top of Page